Kwa mujibu wa ripoti ya Kitengo cha Kimataifa cha Shirika la Habari la Hawza, Ayatullah Sayyid Yasin Mousawi, Imamu wa Swala ya Ijumaa Baghdad, na miongoni mwa walimu mashuhuri wa Hawza ya Najaf Ashraf, katika khutba za Swala ya Ijumaa, akirejelea hatua nyeti ambayo Iraq imo ndani yake baada ya uchaguzi, alisisitiza kuwa kuchaguliwa kwa waziri mkuu “anayezingatia uhuru wa nchi, mwenye uzalendo, mwenye kujitolea na asiyejali maslahi binafsi” ni sharti la kwanza kabisa la mafanikio ya hatua inayokuja.
Alieleza masikitiko yake juu ya mienendo ya baadhi ya makundi ya kisiasa ambayo, licha ya kupata kura nyingi, “yamefungua milango ya uteuzi kwa kila mtu bila vigezo,” na akaonesha mshangao wake juu ya kugombea kwa zaidi ya watu mia mbili kwa wadhifa ya uwaziri mkuu — wakiwemo watu wenye mafaili ya rushwa au historia ya kushindwa katika majukumu ya awali.
Ayatullah Mousawi alitangaza kuwa; kamati mbili za kitaalamu zinaendelea kuyachunguza kwa kina mafaili ya wagombea, na kwamba majina yanayosambazwa katika vyombo vya habari ni “yasiyo sahihi kabisa”. Aliongeza kuwa baadhi ya mipango ya kisiasa iliyowasilishwa na wagombea “haina uhusiano wowote na dhana ya mamlaka ya kitaifa,” na hata katika baadhi yake, kumekuwepo na mazungumzo ya kuvunjwa kwa Hashd al-Shaabi au kuunganishwa kikamilifu ndani ya Wizara ya Ulinzi; jambo ambalo alilielezea kuwa ni “kosa lisiloweza kuvumiliwa.”
Imamu wa Ijumaa wa Baghdad alisisitiza kuwa Hashd al-Shaabi “si mradi wa mpito wala wa kiserikali, bali ndiyo nguzo kuu ya kuendelea kuwepo kwa Iraq na uokozi wa watu wake dhidi ya kuporomoka kabisa mbele ya ISIS.”
Ayatullah Mousawi alionya kuwa wale wanaotaka kufutwa Hashd al-Shaabi “wanapuuzia ukweli kwamba jeshi hilo ndilo lilikuwa kizuizi pekee mbele ya kusonga kwa ISIS; na hilo likiwa katika hali ambayo majeshi ya kawaida yalikuwa yamesambaratika kabisa.” Alikumbusha kuwa miji ilikuwa ikianguka mmoja baada ya mwengine na mashambulizi ya ISIS yalifika kwenye milango ya Baghdad, “na lau isingekuwa fatwa ya jihadi ya kujihami kutoka kwa marjaa, hatima ya Iraq ingekuwa tofauti kabisa.”
Imamu wa Ijumaa wa Baghdad alisisitiza kwamba uwepo wa Hashd al-Shaabi bado ni “hitaji la kweli kwa ajili ya kulinda mfumo wa kisiasa na kuhifadhi mamlaka iliyobaki ya Iraq.” Aliongeza kuwa baadhi ya maafisa wa Marekani na taasisi zake pamoja na makundi yanayohusishwa nao wanajitahidi kuidhoofisha Hashd al-Shaabi, kwa sababu “kikosi hiki ni kizuizi dhidi ya kuporomoka kwa kisiasa na kiusalama kwa Iraq mikononi mwa utawala wa Kizayuni na Marekani.” Alisisitiza kwamba wananchi wa Iraq “hawataruhusu hata kidogo kushambuliwa kwa Hashd al-Shaabi, na watailinda kwa nguvu zao zote pamoja na kulinda haki za wapiganaji wake.”
Maoni yako